𝓡𝓪𝓳𝓪𝓶𝓸𝓷𝔂
10K views • 6 days ago
പഴയകാല കല്യാണക്കാഴ്ച്ച.. ❤️
കല്യാണത്തിന് വന്നവർ വധുഗൃഹത്തിലേക്ക് പോകുന്നത് ഇങ്ങനെയായിരുന്നു, അന്നൊന്നും ഓഡിറ്റോറിയങ്ങൾ ഉണ്ടായിരുന്നില്ല. വീടുകളിൽ വച്ചാകും വിവാഹങ്ങൾ.
ഇന്ന് കാണുന്ന അടിമുടി സ്വർണ്ണമാഘോഷം അന്നില്ല. തലയിൽ അമിതമായി മുല്ലപ്പൂ കണ്ടാൽ അത് വധുവാണ് എന്നു ഉറപ്പിക്കാം....ത്രേ ഉള്ളു. മൂന്നും നാലും കിലോമീറ്റർ ഒക്കെ ഇതു പോലെ ഫോട്ടോയിൽ കാണുന്ന പോലെ ഒരുമിച്ച് നടക്കുമായിരുന്നു വിവാഹത്തിന് വരുന്നവർ. ഇന്നത്തെ റോഡുകൾ അന്നില്ല. നടക്കണം.
വധുവിനും വരനും സാധാരണ വെളുത്ത അംബാസിഡർ കാർ ഉണ്ടാകും. അന്നൊക്കെ മിക്ക ടൂറിസ്റ്റ് കാറും വെള്ള നിറമാകും. വിവാഹങ്ങൾക്ക് പോകാൻ വേണ്ടി,
മറ്റുള്ള നിറങ്ങൾ ഉള്ള വണ്ടികൾ ആരും വാടകക്ക് വിളിക്കില്ല. ടാർ ഇട്ട റോഡുകൾ കുറവും ചില ഉൾവഴികളിൽ വണ്ടി പോവുകയുമില്ല അന്ന്, വധുവരന്മാർ നടന്നു വരുന്നത് കാണാൻ തന്നെ അന്നത്തെ വീടുകളിൽ മുറ്റത്ത് ആളുകൾ നിൽക്കും. വിവാഹം അന്ന് ലളിതവും ജനപങ്കാളിത്തം കൊണ്ട് സമ്പന്നമായ ഒരു ആഘോഷം
തന്നെയായിരുന്നു.
തലേ ദിവസം വെട്ടു പുളിങ്കറി, കായ തൊലിയും പയറും കൂട്ടി ഉപ്പേരി, പപ്പടം, മാങ്ങാക്കറി, പായസം ഒന്നും ഇല്ല, അത്രേ ഉള്ളു അന്ന്.
പെട്രോമാക്സ് വാടകയ്ക്ക് എടുക്കലും കത്തിക്കലുമൊക്കെ ഒരു ചടങ്ങ് ആയിരുന്നു. കൂടെ 2 കോളാമ്പിയും പാട്ട് കേൾപ്പിക്കാൻ !! സ്‌പീക്കർ ഇല്ല എന്ന് എടുത്ത് പറയേണ്ടല്ലോ. അല്ലേ? പിന്നെ ചീട്ടുകളിക്കിടെ പാടാൻ അറിയുന്നവർ പാടും അത് കഴിഞ്ഞാൽ
പാട്ട് വച്ചുള്ള നൃത്തമാണ്. തുള്ളൽ എന്നു അന്നത്തെ കാരണവന്മാർ പറയും.
ലഡ്ഡു, മിച്ചർ, ചായ, പഴം തലേ ദിവസം വരുന്നവർക്ക്.പൊതുവെ ആരും ഒന്നിനും പരാതി പറയില്ല.സദ്യക്ക് പായസം കഴിക്കാൻ മാത്രം ഒരു മത്സരം ഉണ്ടാകും. പാലട, പരിപ്പ് ആണ് പായസങ്ങൾ. അതിൽ കൂടുതൽ പതിവില്ല. അപൂർവ്വങ്ങളിൽ അപൂർവ്വമായി
പഴം പ്രഥമൻ ഉണ്ടാകും. അത്രന്നെ !!
ആദ്യത്തെ പന്തിയിൽ ആരും ഇരിക്കില്ല, ആളുകളുടെ കയ്യും കാലും പിടിച്ചിരുത്തണം. വരന്റെ ആളുകൾക്കാണ് മുൻഗണന. രണ്ടാമത്തെ പന്തി മുതൽ തിരക്കാണ്,
ആ സാമ്പാറിന്റെ ചൂട്‌ ഒന്ന് ആറട്ടെ, എന്നിട്ടാകാം വിസ്തരിച്ചുള്ള ഒരു ഊണ്. സദ്യ വിളമ്പുന്നവർക്കാണ് അന്ന് ഉത്കണ്ഠ, തെറ്റിയാൽ കാരണവന്മാരുടെ ശകാരം കണക്കിന് കിട്ടും, അത് കേട്ട് പെൺപിള്ളേരുടെ ചിരി വളകിലുക്കം പോലെയല്ല അട്ടഹാസം പോലെ അലയടിക്കും എന്ന് അനുഭവസ്ഥർ !!
നാട്ടുകാരും കൂട്ടുകാരുമാണ് ഈ വിളമ്പൽ പ്രക്രിയ ഏറ്റെടുക്കുക, ഞാനും കൂടാറുണ്ട്. കള്ള ലക്ഷണം കാണിച്ചു മുങ്ങാൻ നോക്കുന്നവർക്കാണ് നറുക്ക് ആദ്യം വീഴുക. ഒരു സാമ്പിൾ ഇല ആദ്യം വിളമ്പി വയ്ക്കും
അത് പോലെ വിളമ്പണം. ഓർഡർ അനുസരിച്ചു 4 തരം വറുത്ത ഉപ്പേരിക്കാരെ ആദ്യം വിടും. കായ നാലാക്കി വറുത്തത്, വട്ടത്തിൽ അരിഞ്ഞു വറുത്തത്, ചേന, കയ്പക്ക് ഇതാണ് പതിവ്. ഇന്ന് കാണുന്ന ശർക്കര വരട്ടി പതിവില്ല അന്ന്. അവർക്ക് പിന്നാലെ പുളിയിഞ്ചി പിന്നെ വിവിധ അച്ചാറുകൾ.
ഏറെ രസകരമാണ് വിളമ്പുന്നവരുടെ കോലാഹലങ്ങൾ. സാമ്പാർ എന്ന് ഒരറ്റത്ത് നിന്നും ഉറക്ക വിളിച്ചു പറഞ്ഞാലെ കലവറയിൽ നിന്നും സാമ്പാർ വരു,
അത് ആവശ്യകാർക്ക് വിളമ്പും. ഇത് പോലെ തന്നെ മറ്റു കറികളും. ഇങ്ങനെ മേൽനോട്ടം വഹിക്കാനും ഉറക്ക വിളിച്ചു കൂവാനും തല മൂത്ത ഏതെങ്കിലും കാരണവർ കാണും. അങ്ങേരുടെ തോളത്തു ഒരു നാലായി മടക്കിയ ഒരു തോർത്തും കാണും. കഴിക്കുന്നവരോട് കുശലം പറഞ്ഞു അവരെ ഭക്ഷണം കൂടുതൽ കഴിപ്പിക്കാൻ പ്രേരിപ്പിക്കുന്ന എപ്പോഴും ചിരിക്കുന്ന കാരണവർ !!
ഓലൻ, തോരൻ, അവിയൽ, കൂട്ടുക്കറി, എരുശ്ശേരി, പുളിശ്ശേരി, അച്ചടി, കിച്ചടി, പച്ചടി, പരിപ്പ്, ഉപ്പ് എന്നിവ വിളമ്പാൻ വിടും.
പപ്പടം അവസാനം, രണ്ട് പപ്പടം ഉണ്ടാകും.
വലിയ പപ്പടം ചെറിയ പപ്പടം !! വലിയപടം ചെറിയപടം എന്നാണ് പറയാറ്. ഇപ്പോൾ കേവലം ഒരു പപ്പടം മാത്രം, അത് വലുതും അല്ല ചേറുതും അല്ലാത്ത വലിപ്പത്തിൽ. !!
അതോടു കൂടി ചോറ് വിളമ്പാനുള്ള ആളുകൾ റെഡി ആയി നിൽക്കും. ആളുകൾ ഇരുന്നതിനു ശേഷം മറ്റുള്ള വിഭവങ്ങൾ വിളമ്പുകയായി. തുമ്പപ്പൂ പോലെയുള്ള ചോറു വേണം എന്ന് നിർബന്ധമാണ്. പാലക്കാടൻമട്ട അരി പതിവില്ല.
ചോറ് വിളമ്പിയാൽ പരിപ്പ് കൂട്ടി ഒരു ഉരുള ആദ്യം. പിന്നെയാണ് സാമ്പാർ വിളമ്പുക. സാമ്പാറിന്റെ ആദ്യ ഉരുള പൈനാപ്പിൾ കൊണ്ടുള്ള കിച്ചടി കൂട്ടിയാകണം ആദ്യ ഉരുള, സാമ്പാറിന്റെ കാളൽ ഒന്നു തണുപ്പിക്കാൻ. കറികൾ എല്ലാം രണ്ടാംവട്ടം ചോദിച്ചു വിളമ്പിയതിന് ശേഷം പാലട ആദ്യം പിന്നെ പരിപ്പ്. വിവാഹത്തിന് ഗോതമ്പ് പതിവില്ല. അടിയന്തിരം സദ്യക്കാണ് ഗോതമ്പ് അന്നൊക്കെ. 2 പായസം മാത്രമേ ഉണ്ടാകൂ.
പ്രഥമൻ കഴിഞ്ഞാൽ ചോറു പപ്പടം കൂട്ടി, കൂടെ സംഭാരം വരും. രസവും ആവശ്യക്കാർക്ക് കൈക്കുമ്പിളിൽ കുടിക്കാം
അതിനു ശേഷം ബാക്കി വച്ച പപ്പടം പരിപ്പ് പ്രഥമനിൽ പൊടിച്ചു കഴിക്കാം. കടലാസ് ഗ്ലാസ് ഇല്ല അന്ന്. സ്റ്റീൽ ഗ്ലാസ് വെള്ളം കുടിക്കാൻ മാത്രം, അതിൽ സംഭാരം പോലും വിളമ്പില്ല. ചോദിച്ചാൽ ശകാരമാണ് കിട്ടുക. !!
സദ്യ കഴിഞ്ഞാൽ ഓരോ ചെറുനാരങ്ങ വധുവരന്മാർ തരും, അവരുടെ കൂടെ ഒരു ഫോട്ടോക്ക് ശേഷം, ചെറിയ ഒരു പൂച്ചെണ്ടും.
പിന്നെ സിഗരറ്റ്, മുറുക്കാൻ, പൂവൻ പഴം !!
അതൊക്കെ എടുത്ത് ശാപ്പിടാൻ നല്ല തിരക്ക് ഉണ്ടാകും.പിന്നെ പതുക്കെ അവരവരുടെ വീടുകളിലേക്ക് !!
#പഴയകാല കല്യാണങ്ങൾ ❤️💚 #പഴയ കാല ഓർമ്മകൾ #nostalgia #നൊസ്റ്റാൾജിയ
102 likes
96 shares
